كۇنى كەشە ەلوردادا وتكەن جاستار جىلىنىڭ اشىلۋ سالتاناتىندا ەلباسىنىڭ الدىندا اقتارىلا سويلەپ, ەل رازىلىعىنا بولەنگەن 7 بالانىڭ اناسى جازيرا تۇرعىنوۆانى تۇركىستان وبلىسىنىڭ اكىمى جانسەيىت تۇيمەباەۆ قابىلدادى.
كەزدەسۋدە ءوڭىر باسشىسى باتىر اناعا تولەبي اۋدانى لەنگىر قالاسىنان 4 بولمەلى باسپانانىڭ كىلتىن تابىس ەتتى. ايتۋلى قۋانىشىمەن قۇتتىقتاپ, جۇرەكجاردى تىلەگىن ارنادى. «جۋىردا عانا جازيرا قارىنداسىمىز جاستار فورۋمىنا قاتىسىپ, ەلباسىمىزبەن كەزدەسىپ قايتتى. وي-پىكىرىن ايتتى. ءبىز سول جيىنعا جازيرانى ارنايى جىبەرگەن بولاتىنبىز. سەبەبى, كوپبالالى انا بولۋ – ۇلكەن مارتەبە ءارى قۇرمەت. بۇل – ادامي رەسۋرس جانە مەملەكەتىمىزدىڭ باستى بايلىعى. ءبىز كوپبالالى وتباسىلاردى جۇرتشىلىققا ۇلگى ەتىپ, ولارعا قولداۋدى جاساي بەرۋىمىز قاجەت. بۇگىندە تابيعي ءوسىم بويىنشا تۇركىستان وبلىسى رەسپۋبليكادا كوش باستاپ تۇر. ءدال قازىرگى كەزدە وبلىسىمىزدا 134 مىڭنان استام كوپبالالى انا بار. ونىڭ 51 مىڭنان استامى – «التىن القا» جانە «كۇمىس القا» يەگەرلەرى. جاس قىز-كەلىنشەكتەر وزىڭىزدەي باتىر انالارعا ەلىكتەپ ءوسۋى كەرەك», – دەگەن ءوڭىر باسشىسى جاس وتباسىعا 4 بولمەلى باسپانانىڭ سەرتيفيكاتىن جانە بالالارعا قىستىق جىلى كيىمدەر تابىس ەتتى. سونىمەن بىرگە, وبلىس اكىمى جازيرانىڭ قوسىمشا ماماندىق الۋ ءۇشىن وقۋىنا جانە جۇمىسقا ورنالاسۋىنا قولداۋ كورسەتىلەتىنىن جەتكىزدى. وتاعاسى ولجاس ابىلدابەكوۆتىڭ دە جۇمىسقا ورنالاستىرۋ ماسەلەسى قارالاتىن بولدى.
تۇركىستان وبلىسى تولە بي اۋدانىنىڭ تۇرعىنى جازيرا تۇرعىنوۆا 27 جاسىندا 7 بالانىڭ اناسى اتانعان. بۇگىندە 3 قىز, 4 ۇلدى تاربيەلەپ وتىرعان جازيرا ەلورداعا پاتەر سۇراپ بارماعان-دى. سالتاناتتى جيىندا جاستاردى كوپبالالى بولۋدان قورىقپاۋعا شاقىردى. اتا-بابالارىمىزدان ميراس بولىپ قالعان وسىناۋ بايتاق ەلىمىزدە سابيلەردىڭ كوپ بولعانىن قالايتىنىن ءبىلدىردى. ءار بالا دۇنيەگە ءوز نەسىبەسىمەن كەلەتىنىن ەسكە سالدى. وبلىس اكىمى كىلتىن تابىس ەتكەن 4 بولمەلى باسپانا سول ۇل-قىزدارىنىڭ نەسىبەسى ەكەنى انىق. ايتا كەتەلىك, باتىر اناعا بەرىلگەن باسپانا ءومىر سۇرۋگە قاجەتتى ينفراقۇرىلىممەن جانە جيھازبەن قامتىلعان.
عالىمجان ەلشىباي,
«Egemen Qazaqstan»
تۇركىستان وبلىسى